Isang malaking rebelasyon ang lumabas sa pagdinig ng Senate subcommittee on Justice nitong Martes kaugnay ng kaso ni dismissed Bamban, Tarlac Mayor Alice Guo. Si Shiela Guo, na matagal nang pinaniniwalaang kapatid ni Alice, ay hindi raw pala nito kadugo. Ang pag-amin ni Shiela ay nagdulot ng matinding pagkalito sa mga sumusubaybay sa kaso.

Sa pagharap ni Shiela sa Senado upang magbigay-linaw sa pagtakas ni Alice mula sa Pilipinas, inamin niyang hindi niya ito tunay na kapatid. Ang pag-amin na ito ay nagbigay-daan upang lalong magsiyasat ang mga senador sa tunay na pagkakakilanlan ni Shiela.

Ayon kay Shiela, isa siyang Chinese citizen na dumating sa Pilipinas noong siya ay 16 o 17 taong gulang upang magtrabaho sa isang negosyo ng burda, batay sa utos ng kanyang “ama.”

Ngunit, sa paglilinaw niya, si Jian Zhong Guo, na kinikilalang ama ni Alice, ay siya ring kanyang kinilalang ama-amahan sa Pilipinas. Ipinaliwanag din niya na ipinanganak siya sa China at nananatili roon ang kanyang ina.

“Hindi ako dito pinanganak. Sa China ako pinanganak,” paglilinaw ni Shiela, na nagbigay ng bagong perspektiba sa kanilang relasyon.

Isiniwalat din ni Shiela na pagkadating niya sa Pilipinas, sinabi sa kanya na si Alice ang kanyang kapatid, at mula noon ay namuhay siya ayon sa paniniwalang ito. Ngunit ayon sa National Bureau of Investigation (NBI), si Shiela Guo ay isang Chinese national na may tunay na pangalan na Zhang Mier, batay sa kanyang Chinese passport.

Lahat ng dokumentong pang-Pilipinas ni Shiela, kabilang ang kanyang birth certificate at passport, ay ipinagawa lamang ng kanyang “ama,” ayon sa NBI, na naglalagay sa buong sitwasyon sa ilalim ng masusing imbestigasyon.

Si Alice Leal Guo ang Punong Bayan ng Bamban, Tarlac. Siya ay nanalo bilang punong bayan sa mga pambansang eleksyon noong 2022. Siya ay naging kilala sa buong bansa matapos madawit ang kanyang pangalan sa patuloy na imbestigasyon ng Senado ukol sa Philippine Offshore Gaming Operations o POGO at sa alegasyon ng paglaganap ng mga ilegal na dayuhang naninirahan sa bansa. Ang kanyang pangalan ay naging paksa ng maraming online memes mula noon.

Matatandaang si Sen. Risa Hontiveros ang nagtanong sa tunay na pagkakakilanlan ng suspindidong punong-bayan ng Bamban. Ipinakita ng senadora ang isang dokumento kung saan makikita ang isa pang “Alice Leal Guo.”

Sinabi ni Sen. Hontiveros sa isang pahayag na ang National Bureau of Investigation (NBI) ay nakumpirma na ang mga fingerprint ni Mayor Guo ay tumutugma sa may-ari ng nabanggit na Chinese passport na si Guo Hua Ping.